Qeveria e Kosovës në mbledhjen e sotme ka miratuar nismën e Ministrisë së Industrisë, Ndërmarrësisë dhe Tregtisë, për anëtarësimin e Republikës së Kosovës në ”Byronë Ndërkombëtare të Ekspozitave, përkatësisht aderimin në Konventën e Parisit”.
Për këtë çështje, ka reaguar nënkryetarja e Partisë Demokratike të Kosovës, Vlora Çitaku, përmes një postimi në rrjetin e saj social ‘Facebook‘, në të cilin ka shkruar se Kosova është pjesë e kësaj organizate nga viti 2015.
”Kosova po ashtu ka aderuar në konventat relevante të EXPO. Kosova ka marrë pjesë në EXPO Antalya në vitin 2016, e së fundi edhe në EXPO Dubai”, ka shkruar ajo.
Ndër të tjerash, ajo edhe ironizoi, duke ftuar kryeministrin Kurti ta shpallin pavarësinë edhe një herë, e të aplikohet për anëtarësim edhe në Këshillin e Evropës.
”Sinqerisht, skandaloze. Hajt po e shpallim pavarësinë edhe një here…”.
”Kryeministër, apliko në Këshill të Evropës. Votat i kemi. Mos u bëni qesharak për të aplikuar për antarësim në organizatat ku tashmë jemi anëtar”, ka shkruar Çitaku.
Në vendimin e Qeverisë, thuhet se anëtarësimi ka qëllim promovimin e Republikës së Kosovës, zgjerimin e bashkëpunimit me vendet pjesëmarrëse, prezantimin e avantazheve për investime në Kosovë, si dhe potencialit prodhues e eksportues të vendit.
Kurti kërkon anëtarësim të Kosovës, në organizatën në të cilën është anëtare