Nënkryetarja e Partisë Demokratike të Kosovës (PDK), Vlora Çitaku, ka kritikuar zëvendëskryeministrin Besnik Bislimi, duke thënë se gjuha e përdorur prej tij është e dëmshme dhe e rrezikshme për Kosovën, pasi sipas saj, ai ka lëshuar një “kërcënim ndaj BE-së” mbrëmë në një intervistë.
Ajo, me anë të një postimi në rrjetin social Facebook, ka deklaruar se Bislimi ka përdorur një gjuhë jozyrtare ndaj liderëve të Gjermanisë dhe Francës, Emmanuel Macron dhe Olaf Scholz.
Nënkryetarja e PDK-së e ka akuzuar për arrogancë e injorancë Bislimin.
“Pra, Besnik Bislimi, numri 2 në qeverinë Kurti, përgjegjës për integrim evropian të Kosovës dhe dialog me Serbinë, paska lëshuar një kërcënim ndaj BE-së mbrëmë. Për besë, gjumi nuk po e zë më Macronin dhe Scholzin. Sinqerisht, sikur të mos mbanit përgjegjësi institucionale, situata do të ishte komike. Kjo lloj gjuhe, që ngjason më shumë në përleshje të kafeve, kur përdoret zyrtarisht dhe publikisht nga zv.kryeministri, është e dëmshme dhe e rrezikshme. Arrogancë e injorancë. Mjerim.”, ka shkruar Çitaku.
Deklarata e Çitakut vjen pasi mbrëmë Bislimi në një intervistë në KTV ka thënë se “masat për deeskalim duhet të hiqen për shkak të deeskalimit, mos na detyroni ta eskalojmë situatën për t’ju treguar që e deeskalojmë prapë. Situata në veri ka deeskaluar, tregon që masat që janë vendosur për këtë nuk e kanë më bazën e tyre, rrjedhimisht është e palogjikshme të futen”.