Sekretarja e Përgjithshme e Partisë Demokratike të Kosovës, Vlora Çitaku në konferencën e fundit për media për ditën e sotme, ka thënë pjesëmarrja e qytetarëve në votime është e kënaqshme dhe se PDK-ja është fituese e këtyre zgjedhjeve.
Çitaku u shpreh se nga informacionet që kanë në terren Partia Demokratike e Kosovës ka fituar më së shumti komuna pa balotazh, njofton Dukagjini.
“Partia Demokratike e Kosovës është fituese e këtyre zgjedhjeve, Partia Demokratike e Kosovës ka fituar më së shumti komuna pa balotazh dhe është partia që shkon më së shumti në balotazh. Dëshiroj të bëjë të qartë edhe sa i përket rezultateve të Exit Poll-eve se e vërteta është në kutitë e votimit”, tha Çitaku.
Çitaku, mes tjerash, u shpreh se sa i përket garës për Prishtinën, janë të bindur që kandidati i tyre, Uran Ismaili, shkon në balotazh.
“Ndërsa sa i përket Prishtinës jemi të bindur se kandidati ynë Uran Ismaili shkon në balotazh”, tha Çitaku.