Nënkryetarja e PDK-së, Vlora Çitaku ka reaguar lidhur me vendimin e Ministrisë së  Industrisë, Ndërmarrësisë dhe Tregtisë (MINT) se Komisioni për Shqyrtimin e Ankesave për Regjistrimin e Bizneseve ka marrë vendim për refuzimin e ankesës së televizionit Klan Kosova.

Çitaku ka thënë se duke ia marrë çertifikatën e biznesit “pamundësohet operimi i njërit prej mediumeve më të mëdha e më të rëndësishme në vendin tonë”.

“Sot, idea e lirisë së fjalës dhe mendimit po sulmohet brutalisht.  Kjo më nuk është dhe nuk duhet të jetë betejë e vetëm një mediumi. Kjo është betejë e shoqërisë”, ka shkruar Çitaku.

Ministria e Industrisë, Ndërmarrësisë dhe Tregtisë përmes një njoftimi ka bërë të ditur se Komisioni për Shqyrtimin e Ankesave për Regjistrimin e Bizneseve ka marrë sot vendim për refuzimin e ankesës së televizionit Klan Kosova.

Kështu, ky Komision ka konstatuar se ARBK-ja “në shkallën e parë, ka vendosur në përputhje me ligjin kur e pezulloi certifikatën e biznesit të Klan Kosovës sh.p.k.”.