Nga data 26 maj deri më 9 qershor, Kosova do të jetë nikoqire e ushtrimit më të madh ndërkombëtar “Defender Europe 2025”, të drejtuar nga ushtria e Shteteve të Bashkuara të Amerikës.
Përveç SHBA-së dhe Kosovës, në të marrin pjesë edhe Shqipëria, Kroacia, Maqedonia e Veriut dhe Bullgaria.
Në 8 vendet pritëse të këtij ushtrimi, përfshirë Kosovën, do të marrin pjesë rreth 12 mijë ushtarë nga SHBA-ja dhe 19 vende aleate.
Për Kosovën, ky do të jetë një rikthim në këtë ushtrim, meqë në vitin 2023 pavarësisht se ishte nikoqire, u përjashtua për shkak të tensioneve në veri të vendit.
Organizimin e sivjetmë, ish-ushtaraku Afrim Veseli e vlerëson si mirëbesim dhe partneritet mes Kosovës dhe SHBA-së.
Dobia e saj nuk është vetëm në aspektin ushtarak, por mesazhet janë shumëdimensionale, edhe në aspektin politik: që Kosova nuk është vetëm, është me Shtetet e Bashkuara të Amerikës. Është tregues i qartë që SHBA-ja dhe ushtria amerikane kanë besim ndaj ushtrisë së Kosovës për zhvillimin dhe rritjen e kapaciteteve të saj ushtarake”, ka thënë Afrim Veseli, Ish-ushtarak.
Megjithatë, për ushtarët e FSK-së kjo do të jetë një mundësi shumë e mirë për të avancuar dhe rritur njohuritë e tyre, shton Veseli.
“Në shumë teknika, taktika dhe procedura. Taktikat e ndryshme ushtarake të sulmit, të mbrojtjes, përdorimit të armëve të kalibrave të ndryshëm. Është një mësim i jashtëzakonshëm të marrin praktika se si i zhvillojnë Shtetet e Bashkuara të Amerikës, pastaj sistemi i komunikimit”, ka thënë Afrim Veseli, Ish-ushtarak.
E, sipas analistes politike Magbule Shkodra, kjo tregon partneritetin që SHBA-ja ka me Kosovën, por sipas saj, aspekti politik në këtë rast është më pak i përfshirë.
“Unë e shoh këtë kryekëput në aspektin e sigurisë. Ka një kohë që ne shohim ndryshime gjeopolitike që po ndodhin, dhe së fundmi vizita e Kaja Kallas, që kishte një mesazh në rreshtat e saj se siguria është prioritet dhe Ballkani duhet të jetë kontribuues i sigurisë, dhe në asnjë mënyrë të mos vijë deri te një eskalim”, ka thënë Magbule Shkodra, Analiste politike.
Ministria e Mbrojtjes ka bërë të ditur se gjatë periudhës së ushtrimit do të ketë lëvizje të konvojeve nga bazat e Forcës së Sigurisë së Kosovës në drejtim të rajonit të Gjakovës, saktësisht Aeroportit të Gjakovës dhe poligonit ushtarak në Babaj të Bokës.