Çmimet botërore të naftës shënuan rënie me më shumë se 6% sot (e hëne), pasi SHBA-ja dhe Irani nuk kryen sulme të reja gjatë fundjavës, duke rritur pritjet e tregjeve për një zbutje të tensioneve dhe një rikthim gradual të qarkullimit detar në Ngushticën e Hormuzit, raportoi Reuters përcjell Dukagjini.
Nafta e papërpunuar Brent ra me 6.20 dollarë, ose 6.4%, duke u tregtuar në 90.58 dollarë për fuçi, ndërsa nafta amerikane West Texas Intermediate (WTI) u ul me 5.80 dollarë, ose 6.5%, në 83.51 dollarë për fuçi. Të dyja kontratat arritën nivelin më të ulët në afro një javë, pas rritjeve të vazhdueshme gjatë javëve të fundit.
Sipas Reuters, çmimi i Brent kishte arritur më herët në rreth 100 dollarë për fuçi, ndërsa përshkallëzimi i konfliktit në Lindjen e Mesme kishte ndikuar në transportin e naftës përmes Ngushticës së Hormuzit dhe Detit të Kuq, duke penguar eksportet saudite drejt tregjeve aziatike.
Ambasadori amerikan në Kombet e Bashkuara, Mike Waltz, deklaroi për mediat amerikane se presidenti Donald Trump kishte vendosur të pezullonte operacionet ushtarake për t’i dhënë hapësirë diplomacisë.
Analistët e bankës ING, të cituar nga Reuters, vlerësuan se rënia e menjëhershme e çmimeve reflekton shpresat e tregjeve për një ulje të tensioneve.
“Çmimet e naftës ranë ndjeshëm në fillim të tregtisë, ndërsa SHBA-ja dhe Irani u përmbajtën nga veprime të mëtejshme ushtarake, duke ofruar shenjat e para konkrete të një uljeje të mundshme të tensioneve”, thanë analistët e ING.
Megjithatë, sipas të dhënave të kompanisë Kpler, gjatë fundjavës nëpër Ngushticën e Hormuzit kaluan më pak se 10 anije mallrash në ditë, duke treguar se aktiviteti detar mbetet ende i kufizuar.
Analisti i MST Marquee, Saul Kavonic, tha për Reuters se rikthimi i plotë i transportit detar pritet të jetë gradual, pasi kompanitë e transportit mbeten të kujdesshme për shkak të rreziqeve të sigurisë.
Ndërkohë, trafiku në ngushticën Bab el-Mandeb u ndikua gjithashtu nga sulmet e rebelëve Huthi ndaj objekteve saudite të naftës përgjatë bregdetit të Detit të Kuq.
Pavarësisht rënies së çmimeve, analistët paralajmërojnë se rreziqet për furnizimet globale mbeten të larta për shkak të pasigurisë në Lindjen e Mesme dhe luftës Rusi-Ukrainë. Sipas analistëve të UOB, ndërprerjet e vazhdueshme në zinxhirin e furnizimit mund të mbajnë çmimet e naftës në nivele të larta dhe të shtojnë presionin mbi inflacionin global.
Gjatë fundjavës, Ukraina njoftoi se kishte goditur disa objekte të industrisë së naftës në territorin rus.