Me vizitorë nga rreth 60 shtete dhe me Prishtinën të mbushur me turistë, festivali i 31 korrikut deri më 2 gusht, me yje si Katy Perry, po e shndërron muzikën në një motor të fuqishëm të turizmit dhe ekonomisë së Kosovës.
Festivali Sunny Hill është shndërruar në një nga ngjarjet më tërheqëse verore në Evropën Juglindore, duke sjellë në Prishtinë adhurues të muzikës nga gati 60 vende të botës për edicionin e vitit 2026, që mbahet nga 31 korriku deri më 2 gusht.
Edicioni i këtij viti do të udhëhiqet nga yjet ndërkombëtarë Katy Perry, Martin Garrix dhe Lewis Capaldi, ndërsa në skenë do të ngjiten edhe artistë të tjerë vendorë e ndërkombëtarë, përfshirë EsDeeKid, Seth Troxler, PAWSA, Dhurata Dora, Adam Port & Rampa, Blanco, GJIN, Ledri Vula, MC Kresha, Manifest dhe Carlita.
Festivali u themelua në vitin 2018 nga Dukagjin “Dugi” Lipa, ndërsa promovimi i tij ndërkombëtar bëhet nga vajza e tij, fituesja e tri çmimeve Grammy, Dua Lipa. Në edicionet e kaluara, Sunny Hill ka sjellë në Kosovë emra të mëdhenj të muzikës botërore si Dua Lipa, Miley Cyrus, Calvin Harris, J Balvin, Shawn Mendes, Stormzy, Burna Boy, Bebe Rexha, DJ Snake, Black Coffee, Peggy Gou, Anyma dhe Hardwell.
“Sunny Hill ka qenë gjithmonë më shumë se vetëm muzikë. Për disa ditë çdo verë, ne e sjellim botën në Kosovë dhe i gjithë vendi e ndien këtë ndikim”, ka thënë themeluesi i festivalit, Dukagjin Lipa.
Sipas tij, vëmendja ndërkombëtare që sjell festivali është një promovim që asnjë fushatë turistike nuk mund ta blejë, ndërsa përfitimet mbeten në Kosovë përmes turizmit, sektorit kulturor dhe mundësive për të rinjtë.
Media të huaja e kanë krahasuar Sunny Hill-in me festivalin Coachella, duke theksuar se, ngjashëm si ky festival që ndryshoi imazhin e një zone në Kaliforni, Sunny Hill po ndihmon në ndryshimin e perceptimit për Kosovën si destinacion turistik.
Përgjatë tri ditëve dhe në katër skena, festivali pret mbi 100 mijë vizitorë, duke ndihmuar në promovimin e Prishtinës si një kryeqytet evropian i qasshëm, me çmime të përballueshme dhe me një atmosferë mikpritëse.
Sunny Hill është vlerësuar edhe në nivel evropian. Festivali është përfshirë në listat e European Festival Awards në disa edicione. Në vitin 2022, edicioni në Tiranë u nominua për “Festivalin më të mirë të ri”, ndërsa ai në Prishtinë për “Festivalin më të mirë të madhësisë mesatare”. Në vitet 2024 dhe 2025, festivali u nominua sërish në këtë kategori, përkrah ngjarjeve të njohura si Primavera Sound, Rock Werchter dhe Pohoda.
Ndikimi ekonomik: 22 milionë euro nga edicioni i vitit 2025
Sipas të dhënave të Dhomës së Hotelerisë dhe Turizmit të Kosovës, edicioni i vitit 2025 i Sunny Hill Festival ka gjeneruar rreth 22 milionë euro ndikim të drejtpërdrejtë ekonomik.
Përfitimet janë ndier në sektorë të ndryshëm, përfshirë hotelet, restorantet, transportin, tregtinë dhe bizneset e tjera lokale.
Për këtë ndikim, festivali më pas është nderuar me Çmimin për Ndikim Ekonomik 2025 nga Oda Ekonomike e Kosovës.