Bashkimi Evropian, tregu i vetëm më i pasur në botë, synon të kundërshtojë krijimin e një fondi të ri ndërkombëtar për dëmshpërblimet klimatike, e njëjta temë që pritet të dominojë bisedimet në COP27.
“Ne nuk duam që diskutimet të përqendrohen në një fond të ri,” ka thënë një zyrtar i lartë i BE të premten e 4 nëntorit duke folur në kushte anonimiteti.
Dëmshpërblimet klimatike, të njohura si humbje dhe dëme, i referohen pagesave financiare që vendet në zhvillim nga Jugu Global kërkojnë nga Veriu Global i industrializuar për të kompensuar kërdinë e pakthyeshme të shkaktuar nga kriza klimatike.
Vendet me të ardhura të ulëta argumentojnë se janë të prekura në mënyrë disproporcionale nga fenomenet ekstreme të motit, të tilla si përmbytjet shkatërruese dhe thatësirat më të gjata se zakonisht, edhe pse çlirimi i tyre i emetimeve të gazeve serrë ka qenë i papërfillshëm në krahasim me atë të Veriut, raporton euronews.
Një studim i vitit 2020 i publikuar në The Lancet zbuloi se Veriu Global ishte përgjegjës për 92 për qind të emetimeve të tepërta globale të karbonit që nga ardhja e Revolucionit Industrial, kur djegia e karburanteve fosile u bë normë.
Komuniteti ndërkombëtar tashmë është zotuar të mbledhë 100 miliardë euro në vit për vendet në zhvillim, por këto para janë krijuar për t’u fokusuar në zbutjen (uljen e ndikimit në emetimet e gazeve serrë) dhe përshtatjen (parandalimin dhe minimizimin e efekteve negative të ndryshimeve klimatike.)