Këngëtarja shumë e dashur për publikun dhe artistja më aktive në skenën tonë muzikore, i ka shfrytëzuar rrjetet sociale për t’i paralajmëruar fansat se po e shtyn lansimin e albumit të ri, “Une Jom Ajo”, i cili planifikohej të ishte në dispozicionin e publikut këtë verë.
“Kisha planifikuar ta publikoj albumin tim, “Une Jom Ajo”, gjatë kësaj vere, por kam vendosur ta shtyjë për disa muaj. Arsyeja kryesore për ndryshimin e datës së lansimit është për shkak se kanë ndodhur disa ndryshime pozitive. Muzika ime zakonisht reflekton emocionet e mia dhe e di se kam nevojë të ulem dhe t’i bëjë disa ndryshime në albumin ‘Une Jom Ajo’. Faleminderit për mirëkuptimin. Ky është fillimi i një epoke të re”, shkruhej në postimin e këngëtares.
Kohëve të fundit, Dafina ka qenë lajm i mediave rozë për ndarjen nga i dashuri dhe bashkëpunëtori i saj prej kohësh, DJ Geek. Mund të thuhet se kjo lëvizje e këngëtares në njëfarë mënyrë i konfirmon këto spekulime.
Pesë ditë më parë ajo e lansoi këngën e re me titull, “Harroj”, të cilën e ka realizuar në bashkëpunim me producentin e njohur Cricket.
Bashkëpunimet e kësaj dysheje gjithmonë kanë rezultuar të suksesshme dhe janë mirëpritur nga adhuruesit e muzikës shqipe.