Darkë jozyrtare në Bruksel – Kallas mbledh kryediplomatët e Ballkanit Perëndimor
Përfaqësuesja e Lartë e Bashkimit Evropian për Punët e Jashtme dhe Politikën e Sigurisë, Kaja Kallas, të dielën, më 13 prill do të organizojë një darkë jozyrtare me ministrat e Punëve të Jashtme të vendeve partnere të Ballkanit Perëndimor. Sipas njoftimit, gjatë kësaj darke pune ministrat do të trajtojnë çështje kyçe që lidhen me integrimin […]
Përfaqësuesja e Lartë e Bashkimit Evropian për Punët e Jashtme dhe Politikën e Sigurisë, Kaja Kallas, të dielën, më 13 prill do të organizojë një darkë jozyrtare me ministrat e Punëve të Jashtme të vendeve partnere të Ballkanit Perëndimor.
Sipas njoftimit, gjatë kësaj darke pune ministrat do të trajtojnë çështje kyçe që lidhen me integrimin evropian të Ballkanit Perëndimor dhe sfidat aktuale të sigurisë e bashkëpunimit rajonal.
“Gjatë një drekë pune, ministrat do të diskutojnë se si të avancojnë angazhimin e BE-së me partnerët e Ballkanit Perëndimor”, thuhet në njoftim.
Shefja e BE-së së fundmi ka zhvilluar disa vizita në Ballkanin Perëndimor, duke theksuar angazhimin e BE-së për integrimin e rajonit në strukturat evropiane.
Kallas vizitoi Tiranën, ku u takua me kryeministrin Edi Rama. Ajo vlerësoi përparimin e Shqipërisë në reformat e nevojshme për anëtarësim në BE dhe nënvizoi rëndësinë e vazhdimit të tyre.
Gjatë kësaj vizite, u nënshkrua një marrëveshje me Bankën Evropiane të Investimeve për modernizimin e linjës hekurudhore Durrës-Rrogozhinë, një projekt kyç për transportin dhe mobilitetin ushtarak në rajon.
Gjatë konferencës për media në Tiranë së bashku me kryeministrin Edi Rama, ajo ka theksuar se Kosova dhe Serbia nuk mund të ecin përpara drejt BE-së pa normalizimin e plotë të marrëdhënieve.
Qëndrimi ndaj Bosnje dhe Hercegovinës
Pas Shqipërisë, Kallas vizitoi Sarajevën, ku shprehu shqetësimin e BE-së për veprimet separatiste të udhëheqjes serbe të Bosnjës, Republika Sërpska duke i cilësuar ato si kërcënim për integritetin territorial dhe sovranitetin e vendit.
Ajo theksoi se çdo përpjekje për të ndarë Bosnjën është e papranueshme për BE-në.
Ndërsa, në Podgoricë, Kallas u takua me kryeministrin Milojko Spajiq dhe në Cetinje me presidentin malazez Jakov Milatoviq.
Kallas në Podgoricë theksoi se ishte e shqetësuar për stabilitetin rajonal dhe njoftoi se do të diskutohej gjatë vizitës së saj në Sarajevë.
Gjatë seancave dëgjimore për konfirmimin e saj në postin e shefes të diplomacisë së BE-së, Kallas kishte premtuar që do të punojë që zgjerimi i BE-së të bëhet realitet.















