Njohësi i komunikacionit, Nol Dedaj në emisionin “FIVE” në RTV Dukagjini për testimin e qarkores njëkahore për ndryshimin e trafikut ka thënë se e ka pritur situatën e krijuar në komunikacionin e kryeqytetit gjatë kësaj të premte.
Dedaj tha se qytetaret duhet të orientohen në bazë të shenjave të komunikacionit dhe të respektojnë rrugën njekahore, e cila është duke u ekzekutuar.
“E mira e këtij testimi është se janë eliminuar shume pika konflikti dhe e dyta është se Komuna e Prishtinës në 21 kryqëzime të rrugës që janë në këtë trajektore është e domosdoshme të bëhet dhe studimi i secilit kryqëzim ”, tha njohësi i komunikacionit.
Dedaj ka deklaruar se testimi i qarkorës njëkahore bëhet për të identifikuar të metat dhe sipas tij, gradualisht secila e metë duhet të eliminohet duke pasur parasysh përdorimin e metodave që duhet të aplikohen.
Komuna e Prishtinës ka njoftuar se nga e premtja dhe për dy ditët në vazhdim do të vazhdojë testimi i radhës i shndërrimit të gjithë unazës qendrore të kryeqytetit në qarkore njëkahëshe për automjetet.
I gjithë ky proces ka shkaktuar tollovi në kryeqytet. Kolona të shumta janë shkaktuar në rrugët e kryeqytetit, sidomos në pjesën te Mensa e Studentëve dhe atë mbrapa Komunës së Prishtinës.