Delegacioni i Kuvendit të Kosovës, në drejtim të kryesueses Saranda Bogujevci, janë duke marrë pjesë në sesionin e Këshillit të Evropës në Strasburg, që ka nisur të hënën dhe zgjasë deri më 26 janar.
Anëtarët e delegacionit, gjatë qëndrimit në Strasburg, do të angazhohen në punimet e sesionit, takime me grupe politike dhe komitete, si dhe do të zhvillojnë biseda me delegacione të tjera dhe personalitete të rëndësishme.
Kryetari i Kuvendit, Glauk Konjufca, gjithashtu do të qëndrojë në Strasburg për takime me personalitete dhe delegacione të tjera.
Ai pritet të marrë pjesë në takimin e Komitetit për Çështje Politike dhe Demokraci, ku do të adresohet çështja e aplikimit të Kosovës për anëtarësim në Këshillin e Evropës.
Siç ka njoftuar Kuvendi i Kosovës, në takimin e parë do të paraqitet për konsultim draft-rezoluta për sulmin terrorist të 24 shtatorit në pjesën veriore të Kosovës, iniciuar nga deputeti gjerman, Knut Abraham dhe të tjerë.
Në këtë kontekst, pritet të diskutohen edhe zhvillimet e fundit në Lindjen e Mesme, përfshirë sulmin terrorist të Hamasit ndaj Izraelit.
Gjithashtu, do të trajtohen akuzat për torturë sistematike në vendet e paraburgimit në Evropë.
Sesionin do ta karakterizojë edhe debati mbi situatën e fëmijëve të Ukrainës, ku është bërë kërkesa për një debat urgjent.
Presidenti i Republikës së Qipros, presidenti i Malit të Zi dhe kryeministri i Lihtenshtajnit do të adresohen gjithashtu para Asamblesë.
Liderja e opozitës bjelloruse, Sviatlana Tsikhanouskaya, do t’i drejtohet Asamblesë gjatë debatit për “Një e ardhme demokratike për Bjellorusinë”.
Në përfundim të sesionit, parlamentarët do të zgjedhin Komisionerin e Këshillit të Evropës për të Drejtat e Njeriut.
Në mes të temave të tjera, do të debatohet edhe roli i OECD-së pas agresionit të Federatës Ruse kundër Ukrainës.