Presidenti ukrainas Volodymyr Zelensky njoftoi të martën se ekipi negociator i Ukrainës është nisur drejt Uashingtonit me qëllim arritjen e një “paqes dinjitoze” dhe një përfundim sa më të shpejtë të luftës së nisur nga Rusia në vitin 2022.
Delegacioni tani drejtohet nga ish-ministri i Mbrojtjes, Rustam Umerov, i cili u emërua në krye të ekipit pas ndryshimeve të fundit të shkaktuara nga një valë skandalesh korrupsioni në Kiev.
Në platformën X, Zelensky tha se misioni i negociatorëve është “të hartojnë sa më shpejt dhe në mënyrë thelbësore hapat e nevojshëm për t’i dhënë fund luftës”.
Ndryshimet në ekipin negociator erdhën pasi shefi i stafit presidencial Andriy Yermak dha dorëheqjen të premten, pas një kontrolli në banesën e tij në kuadër të një hetimi për korrupsion. Zelensky më pas nënshkroi një dekret për riorganizimin e ekipit dhe caktoi Umerovin në krye të delegacionit.
Presidenti ukrainas theksoi se bisedimet me Shtetet e Bashkuara po zhvillohen “në mënyrën më konstruktive të mundshme”, duke përsëritur se “Ukraina po punon për një paqe dinjitoze”.
Ndërkohë, plani 28-pikësh i presidentit amerikan Donald Trump është rishikuar një herë gjatë takimeve në Gjenevë midis zyrtarëve amerikanë dhe evropianë, por disa çështje të ndjeshme mbeten ende për t’u adresuar në Uashington.
Edhe pse emri i Umerovit është përmendur në kuadër të hetimeve për korrupsion, ai ka mohuar çdo lidhje me skandalin.