Donjeta Demolli, anëtare e Partisë Social Demokrate (PSD), e ftuar në emisionin “Rreth e Rrotull” në RTV Dukagjini, ka kritikuar qeverinë aktuale, pasi sipas saj ajo po tregohet indiferente në raport me zhvillimin në fëmijërinë e hershme.
Demolli përmend edhe përqindjen e vogël të fëmijëve të përfshirë në çerdhe, përqindje e cila është mbi 5%. Kosovën e krahason me Shqipërinë duke përmendur faktin se kjo përqindje në Shqipëri është 80%.
“Dmth ky dallim kaq i madh na tregon që pushteti aktual nuk është i interesuar ta bëjë një kapërcim në gjendjen që e kemi në raport me fëmijët”, është shprehur Demolli.
Ndërkaq, Blerina Lila, pedagoge, tregon se kushte për zhvillimin në fëmijërinë e hershme ka, por janë vetëm private, qoftë çerdhe, shërbime të tjera sportive, kulturore apo akademike.
“Jo të gjithë prindërit kanë mundësi me pagu, jo të gjithë qëndrojnë mirë financiarisht, prandaj është ankesë prej shumicës tjetër të prindërve që kanë nevojë të kenë sherbime publike ku nuk ka kosto, ku fëmijët edhe shoqëria na zhvillohen paralelisht në shumë aspekte”, ka thënë Lila.
Ditëve të fundit Kuvendi i Kosovës ka miratuar ligjin për zhvillimin në fëmijërinë e hershme, që obligon dërgimin e fëmijëve që janë pesë vjeç, në shkollim parafillor.