Gjykata Themelore në Prishtinë ka shpallur aktgjykim dënues ndaj Endrit Nikës, duke e dënuar me 18 vjet burgim për vrasjen e shtetases argjentinase, partneres së tij, në Fushë-Kosovë në vitin 2023.

Aktgjykimi u shpall të enjten nga kryetari i trupit gjykues, Gazmend Bahtiri, së bashku me anëtarët Gëzim Ademi dhe Alltën Murseli.

Në seancë ishin të pranishëm prokurori Armend Hamiti, avokati mbrojtës Drilon Imeri, si dhe pala e dëmtuar me përfaqësuesin ligjor Betim Shala.

I akuzuari ishte deklaruar i pafajshëm në seancën e 28 majit 2025.

Sipas aktakuzës së ngritur më 11 shkurt 2025 nga Prokuroria Themelore në Prishtinë, Nika akuzohej se më 1 gusht 2023, në një hotel në Fushë-Kosovë, pas një mosmarrëveshjeje me të dashurën e tij, fillimisht e kishte sulmuar fizikisht dhe kishte tentuar ta shkelte me veturë në parkingun e hotelit.

Më pas, sipas aktakuzës, pasi kishin hyrë në dhomën e hotelit, ai kishte vazhduar dhunën ndaj saj dhe, me dashje për ta privuar nga jeta, e kishte hedhur nga dritarja e dhomës në katin e gjashtë. Viktima kishte pësuar lëndime të rënda dhe, pavarësisht trajtimit mjekësor në QKUK, kishte ndërruar jetë.

Me këto veprime, Endrit Nika ishte akuzuar për veprën penale “Vrasje e rëndë” sipas nenit 173, paragrafi 1, pika 1.3 të Kodit Penal të Kosovës.