Gjykata Themelore në Prishtinë, Departamenti Special ka shpallur fajtor të akuzuarin L.B, për shkak të veprës penale në bashkëkryerje “Shtytja për kryerjen e veprave terroriste” dhe për veprën penale “Mbajtja në pronësi, kontroll ose posedim të paautorizuar të armëve”.
I akuzuari L.B. është shpallur fajtor dhe është dënuar me dënim me burgim në kohëzgjatje prej dy 2 vjetësh, në të cilin dënim do t’i llogaritet edhe koha e kaluar në masën e paraburgimit dhe në masën e arrestit shtëpiak nga data 15 maj 2023 deri me 7 mars 2024 dhe dënim me gjobë në shumë prej tre mijë euro, të cilin dënim i akuzuari duhet ta paguajë në afat prej 15 ditësh pas plotfuqishmërisë së këtij aktgjykimi.
Siç ka njoftuar gjykata, nga i akuzuari konfiskohen përgjithmonë sendet e luajtshme, si mjete që kanë mundësuar kryerjen e veprës penale dhe sendet që i nënshtrohen automatikisht konfiskimit, të cilat janë sekuestruar përkohësisht me vendimin e gjykatës, si sende të përdorura apo të destinuara për kryerjen e veprës penale.
“Obligohet i akuzuari që në emër të shpenzimeve të procedurës gjyqësore, në emër të paushallit gjyqësor të paguajë shumën prej 100 euro, në afat prej 15 ditësh nga dita e plotfuqishmërisë së këtij aktgjykimi, po ashtu obligohet i akuzuari që në emër të kompensimit të viktimave të krimit të paguajë shumën prej 100 euro, në afat prej 15 ditësh nga dita e plotfuqishmërisë së këtij aktgjykimi”.
Në bazë të nenit 367 paragrafi 1 të Kodit të Procedurës Penale të Republikës së Kosovës, pas shpalljes së aktgjykimit, gjykata i ka udhëzuar palët për të drejtën në ankesë.