Më shumë se 1 muaj Gjykata Themelore në Prishtinë, priti që Oda e Avokatëve të Kosovës të dërgojë emrat e disa prej avokatëve që kishte caktuar në rastin ku janë të akuzuar 21 persona për masakrën e Reçakut.
Por, Oda e Avokatëve nuk iu përgjigj, e si shkak i kësaj ka dështuar të nisë edhe gjykimi në mungesë ndaj tyre.
Violeta Namani – Kryetare e trupit gjykues deklaroi se “Në mungesë të katër avokatëve mbrojtës në këtë cështje penale gjykata ka paraqitur kërkesë pranë Odës së Avokatëve më datë 01.06.2026, për angazhimin e avokatëve të rinj për katër të akuzuarit e lartëcekur por deri më tani pas kërkesave të vazhdueshme ata nuk e kanë njoftuar gjykatën.”
Përvec gjykatës, përpjekje për të ditur emrat e avokatëve kishte bërë edhe prokuroria Speciale, por nga 21 avokatët që duhet të merrnin shkresat e lëndës, vetëm 10 kishin shkuar në prokurori.
Ilir Morina – Prokuror në Prokurorinë Speciale deklaroi se “Prokuroria ka bërë përpjekje maksimale që të identifikojë se cilërt janë avokattë e rinjë të caktuar nga oda e avokatëve në këtë cështje penale nuk kemi pasur sukses, më 29.06.2026, i kemi drejtua email gjykatës ku kemi kërkuar listës e avokatëve që janë caktuar sipas detyrës zyrtare në këtë cështje penale, pas pranimit të emailit nga gjykata 10.07.2026, u kemi dërguar email të gjithë avokatëve të angazhuar në këtë cështje penale, vetëm 10 avokatë kanë ardhur i kanë marr shkresat e lëndës.”
E disa nga avokatët edhe u ankuan se nuk e kishin ditur se për çfarë rasti ishin caktuar sipas detyrës zyrtare.
Problematika të tilla si shkak i moskuminikimit të Odës së Avokatëve me gjykatën, ishin arsyeja që javë më parë, ka dështuar të nisë gjykimi në mungesë ndaj 21 të pandehurve të akuzuar për dëbimin e 800 mijë shqiptarëve gjatë kohës së luftës.
Sipas aktakuzës, së PSRK-së në periudhën 1998 – 1999, të pandehurit, në bashkëkryerje, si pjesëtarë të Ushtrisë së ish-Jugosllavisë, Brigadës “243 të Mekanizuar”, Armatës së III- të, e njohur si “Korpusi i Prishtinës”, si dhe pjesëtarë të Ministrisë së Punëve të Brendshme (MUP), kanë kryer edhe trajtim çnjerëzor, shkatërrim të pasurisë, dëbim masiv dhe spastrim etnik të popullsisë civile.