Kryeministri në detyrë i Kosovës, Albin Kurti, ka pritur këtë të mërkurë të dërguarin e posaçëm të Bashkimit Evropian për Dialogun Kosovë–Serbi, Peter Sorensen.
Nga Zyra e Kryeministrit bëhet e ditur se në takimin e parë pas zgjedhjeve të 28 dhjetorit, Kurti theksoi se rezultati zgjedhor ka prodhuar një legjitimitet të ri demokratik, i cili garanton parashikueshmëri politike dhe stabilitet institucional, duke forcuar më tej funksionimin e rendit kushtetues të Republikës së Kosovës.
“Ky legjitimitet i lartë, i dalë drejtpërdrejt nga vullneti i qytetarëve, siguron përfaqësim të drejtë, kredibil dhe parimor të Kosovës në dialog. Sa i përket palës tjetër në dialog, Kryeministri vlerësoi se e njëjta gjë nuk mund të thuhet për lidershipin në Serbi”,thuhet në njoftim.
Ai ia ka shprehur Sorensenit gatishmërinë e Kosovës për normalizim të plotë të marrëdhënies me Serbinë dhe dialog konstruktiv në Bruksel, por ka treguar edhe gjërat që janë me rëndësi thelbësore, përfshirë edhe dorëzimin e kryeterroristit Milan Radoiçiq, që akuzohet se ishte udhëheqës i sulmit terrorist në Banjskë më 24 shtator të vitit 2023, gjatë të cilit u vra rreshteri policor Afrim Bunjaku.
“Kurti shprehu gatishmërinë e Republikës së Kosovës për normalizim të plotë të marrëdhënieve me Serbinë dhe dialog konstruktiv në Bruksel, duke theksuar rëndësinë thelbësore të tërheqjes së letrës së ish-kryeministres Bërnabiq, të deponuar në Shërbimin Evropian për Veprim të Jashtëm (EEAS), dorëzimit të kryeterroristit Millan Radoiçiq, për të cilin tashmë ka aktakuzë 160 faqëshe nga Prokuroria e Republikës së Kosovës, dhe nënshkrimit të Marrëveshjes Bazike dhe Aneksit të Zbatimit si garanci juridike dhe mirëbesim për rrugën përpara”, thuhet në njoftim.
Kurti, mes tjerash, nënvizoi se me zbatimin e plotë të Marrëveshjes Bazike të Brukselit dhe Aneksit të Zbatimit të Ohrit, dialogu prodhon rezultate të qëndrueshme.