Dy helikopterë ushtarakë u përplasën në ajër dhe u rrëzuan gjatë stërvitjeve të martën në Malajzi, duke shkaktuar vdekjen e të gjithë 10 personave në bord.
Siç ka raportuar marina malajziane, helikopterët po kryenin ushtrime në një bazë të marinës në veri të vendit për festën e 90-vjetorit të marinës, kur ndodhi aksidenti.
“Të gjitha viktimat u konfirmuan të vdekur në vendin e ngjarjes”, thuhet në njoftimin e marinës, duke shtuar se mbetjet mortore janë dërguar në spital për identifikim.
Shtatë pjesëtarë të ekuipazhit ndodheshin në helikopterin AW139, i cili shërben për operacione detare, ka thënë marina, duke bërë të ditur se tre pjesëtarë të tjerë ishin në helikopterin e lehtë, Fennec, prodhim i Airbusit evropian.
Mediet lokale, sipas REL-it, raportuan se AW139 u rrëzua pranë një kompleksi sportiv në bazën e marinës, ndërsa Fennec ra në një pishinë pranë.
Marina malajziane gjithashtu ka thënë se do të ndërhyjë për të kryer një hetim, për të zbuluar shkaktarin e aksidentit.