Nënkryetarja e Partisë Demokratike të Kosovës, Vlora Çitaku, ka reaguar për dy vrasjet e ndodhura të mërkurën e 29 nëntorit në Prishtinë.
Përmes një statusi në Facebook, Çitaku ka kërkuar përgjegjësi për atë që ajo e quan shkallë e pasigurisë.
“Dy vrasje brenda natës në kryeqytet. Përtej dhimbjes dhe solidaritetit me familjarët e viktimave, dikush duhet të japë përgjegjësi për këtë shkallë të pasigurisë. Vrasje, plaçkitje, rrahje gjithandej. E tmerrshme”, shkroi ajo.
Të mërkurën e 29 nëntorit, Prishtina dhe i gjithë vendi u trondit nga dy vrasje që ndodhën brenda dy orësh.
Liridona Murseli, bashkëshortja e ish-këshilltarit të presidentit Behgjet Pacolli, Naim Murseli, mbeti e vrarë pas të shtënave që u dëgjuan në rrugën “Dalip Alshiqi” në Prishtinë.
Sipas informatave që posedon redaksia, dyshohet se fillimisht Murseli, i cili ishte me familje në veturë, ishte cak i një grabitjeje, ku pas të shtënave nga grabitësit mbeti e vrarë gruaja e tij.
Policia e Kosovës, po ashtu, ka njoftuar se një tjetër vrasje ka ndodhur në Prishtinë, më saktësisht në rrugën “Ali Vitia” në kryeqytet.
Këtë e ka konfirmuar për Dukagjinin, zëdhënësja e Policisë për Rajonin e Prishtinës, Flora Ahmeti, e cila ka theksuar se dyshohet se viktima u ther me thikë.