Një diplomat britanik është dëbuar nga Rusia për atë që Ministria e Jashtme e Mbretërisë së Bashkuar e përshkroi si “akuza keqdashëse dhe të pabazuara” për spiunazh.
Diplomati, emri i të cilit nuk u bë publik, kishte dy javë kohë për të lënë vendin, tha Ministria e Jashtme ruse, pasi pretendoi se kishte marrë informacion “lidhur me përkatësinë e një punonjësi diplomatik në ambasadë me shërbimin sekret britanik”, shkruan The Guardian, transmeton Dukagjini.
Ministria ruse tha se Moska nuk do të toleronte aktivitetet e oficerëve të inteligjencës britanike të padeklaruar në Rusi dhe se Rusia do të reagonte me vendosmëri nëse Mbretëria e Bashkuar përshkallëzon situatën.
“U dha gjithashtu një paralajmërim se nëse Londra e përshkallëzon situatën, pala ruse do të japë një përgjigje vendimtare ‘pasqyrë’,” shtoi ministria.
Ministria e Jashtme britanike tha se veprimet e Moskës erdhën “nga dëshpërimi” dhe se Mbretëria e Bashkuar po shqyrtonte reagimin e saj.
“Kjo nuk është hera e parë që Kremlini ka bërë akuza keqdashëse dhe të pabazuara ndaj stafit tonë. Shënjestrimi i diplomatëve britanikë vjen nga dëshpërimi dhe veprime të tilla minojnë kushtet bazë të nevojshme për funksionimin e misioneve diplomatike. Ne po shqyrtojmë me kujdes opsionet tona për reagim.”
Rusia dhe Shtetet e Bashkuara u zotuan në fillim të vitit të kaluar të rindërtonin nivelet e personelit në ambasadat e tyre, si pjesë e një ofensive afrimi ndaj Moskës nga presidenti amerikan Donald Trump, e cila u kritikua gjerësisht në Evropë.
Rusia dhe Mbretëria e Bashkuar kanë dëbuar periodikisht diplomatët e njëra-tjetrës që nga fillimi i luftës në Ukrainë. Së fundmi, Rusia dëboi një diplomat britanik dhe bashkëshorten e një tjetri në mars të vitit të kaluar, duke pretenduar se të dy ishin spiunë.