Kryeministri i vendit, Albin Kurti ka thënë se dëshmorët e Ushtrisë Çlirimtare të Kosovës (UÇK) e përfaqësojnë grupin e fundit të madh të të rënëve për liri, duke theksuar se ata janë të vetmit “që e kanë vulosur angazhimin e tyre për vendin”.
Duke kujtuar 5 majin si ditën e dëshmorëve të kombit shqiptar, kryeministri Kurti shkroi në Facebook se liria e fituar nga dëshmorët është mundësi për vetëvendosje dhe përparim.
“5 maji është dita e dëshmorëve të kombit shqiptar, të rënë kudo dhe kurdo gjatë historisë. Andaj sot i kujtojmë të gjithë dëshmorët e rënë në të gjitha etapat e së kaluarës sonë. Trofeu i synuar dhe trofeu i fituar nga dëshmorët, është liria jonë, si mundësi për vetëvendosje dhe përparim. Dëshmorët janë dëshmi e orëve të historisë, dëshmitarë të historisë së kombit. Jeta, vepra dhe rënia e tyre përcillen si mësime dhe frymëzime ndër breza. Çmimi i lirisë është paguar me gjakun e dëshmorëve, andaj jeta e tyre është e paçmueshme në të gjitha kohët”, ka deklaruar ai.
Kurti shtoi se detyrë e të gjallëve dhe e brezave të ardhshëm është angazhimi dhe përpjekja për atdheun e lirinë.