Kosova këtë të enjte shënon Ditën Kombëtare të Personave të Zhdukur.
Edhe 24 vjet pas luftes, ende nuk dihet asgjë për fatin e 1621 personave të zhdukur me dhunë nga forcat serbe.
Forumi i Shërbimit Civil të Paqes në Kosovë ka një thirrje për qytetarët.
“Për të shënuar Ditën Kombëtare të Personave të Pagjetur, më 27 prill në ora 20:30, ftojmë të gjithë qytetarë/et e Kosovës t’i ndalin dritat nëpër shtëpitë apo banesat e tyre për 5 minuta”, thuhet në thirrjen e këtij forumi.
Në nder të të pagjeturve, kryeministri i Kosovës, Albin Kurti, do të bëjë homazhe te përmendorja dedikuar personave të zhdukur me dhunë gjatë luftës.
Edhe Nisma e të Rinjve për të Drejtat e Njeriut – Kosovë (YIHR KS), përmes një aktiviteti, shënon Ditën Kombëtare të Personave të Pagjetur.
Shoqata për dëme të luftës “Ngritja e zërit” prezanton dokumentarin për krime të luftës “Krimet e pandëshkuara të Serbisë 1981-1999”, me rastin e Ditës Kombëtare të të pagjeturve.
Ndërkaq, në orët e mbrëmjes jepet shfaqja teatrore “Babai dhe Babai”.
Ky aktivitet organizohet nga Ministria e Drejtësisë, Kuvendi i Kosovës dhe “Integra”, me rastin e Ditës Kombëtare të Personave të Pagjetur në hollin e Kuvendit të Kosovës.
Gjatë luftës së fundit në Kosovë, më 1998-1999 janë vrarë rreth 13 mijë e 500 persona, shumica dërrmuese shqiptarë.
Prej këtyre viktimave, 76 për qind besohet se ishin civilë. Ndërkaq, për nga përkatësia etnike, 10 mijë e 794 janë shqiptarë, 2 mijë e 197 serbë, kurse të tjerët u përkasin përkatësive të tjera etnike.
Një plagë tjetër e luftës janë edhe rreth 1 mijë e 600 persona të pagjetur, kryesisht shqiptarë.
Në përfundim të misionit të tij, Tribunali Ndërkombëtar për Krime Lufte në ish-Jugosllavi, ka rekomanduar që vendet e ish-Jugosllavisë ku përfshihej edhe Kosova, t’i hetojnë dhe trajtojnë krimet që janë kryer në territorin e këtyre vendeve.