Serbia ka dërguar një notë proteste ndaj ambasadës së Shqipërisë në Beograd për djegien e flamurit serb në qendër të sheshit “Skënderbej”, më 20 nëntor, mbrëmjen kur u luajt ndeshja Shqipëri-Ishujt Faroe, në “Air Albania” në kuadër të kualifikimeve të Euro 2024.

Në njoftimin e Ministrisë së Punëve të Jashtme të Serbisë theksohet se incidente të tilla dëmtojnë marrëdhëniet dypalëshe të dy vendeve dhe kërkohet vënia para përgjegjësisë e autorëve, shkruajnë mediet atje.

“Ne besojmë se ngjarje të tilla dëmtojnë marrëdhëniet dypalëshe të dy vendeve, të cilat në vitet e fundit kanë arritur pikën më të lartë gjatë historisë së tyre të përbashkët shekullore”, thuhet në njoftimin e  ministrisë, e cila pret që institucionet kompetente të Shqipërisë të bëjnë gjithçka për të identifikuar dhe ndjekur penalisht autorët, të cilët duken qartë në videon e djegies së flamurit të publikuar nga mediet.

Në notë shprehet pritshmëria që Shqipëria të informojë institucionet e Serbisë për këtë nëpërmjet kanaleve diplomatike brenda një periudhe të arsyeshme kohore.