Zyrtarët e Doganës së Kosovës kanë ndaluar një pajisje të dyshuar për përdorim ushtarak gjatë kontrollit të një automjeti në hyrje të pikëkalimit kufitar në Kullë.
Sipas Doganës, rasti ka ndodhur më 20 gusht 2026, kur zyrtarët doganorë ndaluan për kontroll një automjet me targa të huaja, të drejtuar nga një shtetas i Republikës së Kosovës.
Gjatë intervistimit, udhëtari ishte pyetur nëse kishte mallra apo mjete që duhej të deklaroheshin, por nuk kishte deklaruar ndonjë mall.
Megjithatë, bazuar në dyshimet e krijuara gjatë kontrollit, zyrtarët kryen kontroll të detajuar të automjetit. Gjatë kontrollit u gjet një dylbi e destinuar për përdorim me pushkë snajper, për të cilën nuk ishin paraqitur dokumentet apo autorizimet përkatëse.
Pajisja është ndaluar nga Dogana, ndërsa ndaj personit janë ndërmarrë masat përkatëse dhe është iniciuar procedurë kundërvajtëse, si dhe procedura të tjera administrative në pajtim me legjislacionin në fuqi.
Dogana ka theksuar se, sipas Kodit Nr. 08/L-247 Doganor dhe të Akcizave, mallrat që hyjnë në territorin doganor të Kosovës i nënshtrohen mbikëqyrjes dhe kontrolleve doganore, përfshirë edhe ndalesat dhe kufizimet që lidhen me sigurinë publike.
Dogana e Kosovës ka deklaruar se mbetet e përkushtuar në kontrollin e kufijve dhe parandalimin e hyrjes së mallrave të rrezikshme, të kufizuara apo të palejuara.