Doktoresha Venera Berisha-Muharremi po merr pjesë në “ENDO 2026”, Kongresin Vjetor të Shoqatës Amerikane të Endokrinologjisë, i cili po mbahet në Çikago të Shteteve të Bashkuara të Amerikës dhe konsiderohet si një nga ngjarjet më të rëndësishme globale në fushën e endokrinologjisë.
Berisha-Muharremi bëri të ditur se në këtë kongres do të marrin pjesë mbi 7,000 shkencëtarë dhe mjekë nga e gjithë bota, me qëllim të shkëmbimit të njohurive dhe prezantimit të zhvillimeve më të fundit në mjekësi, njofton Dukagjini.
Si anëtare e “Endocrine Society” dhe përfaqësuese e Kosovës dhe Universitetit të Prishtinës, ajo do të prezantojë një punim shkencor që trajton “Photobiomodulimin”, një metodë inovative për trajtimin e sëmundjeve të tiroides me laser.
“Kam nderin këto ditë të marr pjesë në ENDO 2026, në Çikago, ku janë mbledhur mbi 7,000 shkencëtarë dhe mjekë të endokrinologjisë nga mbarë bota për të formësuar të ardhmen e mjekësisë. Si përfaqësuese e Kosovës dhe Universitetit të Prishtinës, do të prezantoj me krenari punimin tonë shkencor mbi Photobiomodulimin, një trajtim inovativ me laser të tiroides”, ka shkruar Berisha-Muharremi.
Ajo e cilësoi këtë pjesëmarrje si një arritje të rëndësishme për mjekësinë kosovare dhe një mundësi për të prezantuar inovacionin dhe punën shkencore të realizuar në Kosovë para ekspertëve më të njohur ndërkombëtarë të fushës.