Një thirrje kreative e shkruar me dorë e me bukurshkrim nga një zyrtare e Kompanisë Rajonale të Ujësjellësit “Prishtina”, bëri që të arrihet qëllimi i saj.
Ajo u publikua një ditë më parë në faqen e ujësjellësit derisa bëhej thirrje që pos pagesës së ujit, të shkarkohet aplikacioni për të kryer shërbimet.
E as 24 orë më pas, 6 mijë qytetarë e kanë bërë një gjë të tillë.
Pos bujës së madhe në rrjete sociale, efektin e formës së thirrjes po e konfirmon edhe ajo e cila e shkroi këtë thirrje.
Arjeta Mjeku, zëdhënëse e KRU “Prishtina”, ka thënë se “Pikërisht ajo çka e mendova, ajo u arritë pra qëllimi u arritë, sikur shkëmbimi i letrave të dashurisë, dhe duke biseduar me persona të ndryshëm më erdhi ideja që njerëzit kanë nevojë për shumë sinqeritet, më shumë vertëtësi andaj mendova që kjo mund të ishte një marketing i përkryer që mund ta bëjë që konsumatorët do ta shkarkonin aplikacioniin në IOS dhe Android”.
Për efektin e saj dhe mënyrën e veçantë se si institucionet duhet të komunikojnë me publikun, flasin edhe ekspertët e marrëdhënieve me publikun.
Dardan Hasku nga PIAR ka thënë se “Krijimi i një fushate spontane siç ishte kjo e KRU “Prishtina” është jetike meqë pjesë e një plani të komunikimi të kujdo qoftë, shumë shpesh gjerat që janë spontane janë shumë ma shumë efikase sesa planet e kompanive të ndryshme”.
Kompania Rajonale e Ujësjellësit “Prishtina”, përmes këtij njoftimi u ka kërkuar qytetarëve që tash e tutje mund ta shkarkojnë aplikacionin e-KRUP, nga i cili mund të bëjnë pagesën në formë elektronike të faturave.