Milovan Drecun ka deklaruar se aktakuza kundër Hashim Thaçit, Kadri Veselit, Rexhep Selimit dhe Jakup Krasniqit në Gjykatën Speciale në Hagë është kryesisht rezultat i punës së autoriteteve serbe.
Drecun ka deklaruar për Radio Televizionin Serb se jo vetëm që e ka ndjekur nga afër procesin gjyqësor, por ka punuar me vite për të siguruar që gjyqi dhe aktakuza të realizoheshin që në fillim.
Ai kujtoi se kishte formuar një grup pune të angazhuar në mbledhjen e informacioneve duke i quajtur si “fakte e prova”, dhe ka shtuar se kishte vendosur bashkëpunim me Zyrën e Prokurorit të Specializuar.
“Ju kujtohet që unë formova një grup pune që u angazhua në mbledhjen e fakteve dhe provave. Vendosa bashkëpunim me zyrën e prokurorit të specializuar dhe që atëherë pashë se çështjet kryesore në aktakuzë do të ishin ndalimet e paligjshme dhe organizimi hierarkik i UÇK-së. Ne e siguruam atë dokumentacion, siguruam 86 ndalime të paligjshme, emrat e atyre që u ndaluan, kush ishin organizatorët e atyre kampeve, që keqtrajtuan njerëz, vranë njerëz. Dhe siguruam pesë, për aq sa mbaj mend, ndalime të paligjshme në territorin e Republikës së Shqipërisë”, ka thënë Drecun.