Drejtori i Policisë, Samedin Mehmeti, ka bërë të ditur se me teknologjinë e re, pritet që indentifikimi i kundërvajtjeve do të bëhet me anë të makinave të reja të policisë.
Po ashtu, gjobat e trafikut do të shqiptohen në mënyrë elektronike dhe përmes postës do t’u dërgohen në shtëpi qytetarëve të cilëve iu është shqiptuar gjoba.
Mehmeti ka bërë të ditur se janë furnizuar me vetura të reja.
“Identifikimi i kundërvajtjes do të bëhet nga makinat e reja të Policisë së Kosovës. Gjoba do të shqiptohet në mënyrë elektronike, do të printohet dhe do t’i dërgohet me postë në shtëpi”, ka deklaruar Mehmeti.
Sipas drejtorit të policisë, me anë të këtyre mjeteve do të mundësohet identifikimi më i lehtë i personave të kërkuar nga Policia e Kosovës.
“Këto mundësojnë edhe identifikim e personave të kërkuar nga policia e Kosovës për vepra të ndryshme, gjate qarkullimit në komunikacion”, ka thënë Mehmeti.
Këto u thanë në konferencën e organizuar nga Policia e Kosovës, ku edhe është paraqitur projekti më i ri, me pajisjet më të reja “Patrulla Inteligjente” që do t’i ketë nën funksion dhe posedim Policia.
Përmes këtij projekti, Policia e Kosovës synon t’i ngrisë kapacitetet operative, profesionale dhe teknologjike.
Me anë të teknologjisë, Policia e Kosovës pret që të rritet siguria, sidomos ajo rrugore.
