Drejtori i Qendrës Memoriale të Srebrenicës, Emir Suljagiç, ka dorëzuar kallëzim penal në Prokurorinë e Bosnjës dhe Hercegovinës kundër liderit të SNSD-së, Millorad Dodik, pas deklaratave të këtij të fundit në mbështetje të Ratko Mlladiçit.
Suljagiç tha se kallëzimi u bë pasi Dodik, gjatë një interviste në televizionin ATV në Banja Lukë më 5 maj, e cilësoi Mlladiçin si “komandantin suprem të Ushtrisë së Republikës Srpska dhe hero kombëtar të këtij populli”.
Ratko Mlladiç është dënuar me burgim të përjetshëm nga Gjykata e Hagës për gjenocid në Srebrenicë, krime kundër njerëzimit dhe krime lufte të kryera gjatë luftës në Bosnjë dhe Hercegovinë.
Suljagiç theksoi se deklaratat e Dodikut bien ndesh me ndryshimet në Kodin Penal të Bosnjës dhe Hercegovinës, të miratuara në korrik të vitit 2021 nga ish-Përfaqësuesi i Lartë Valentin Inzko, të cilat ndalojnë mohimin e gjenocidit dhe glorifikimin e kriminelëve të luftës.
Ligji parasheh dënime me burg nga gjashtë muaj deri në pesë vjet për këdo që publikisht miraton, mohon, minimizon apo justifikon gjenocidin, krimet kundër njerëzimit ose krimet e luftës të konfirmuara me vendime të formës së prerë gjyqësore.
“Ratko Mlladiç është dënuar për gjenocid në Srebrenicë. Tani Prokuroria e Bosnjës nuk mund të pretendojë se nuk ekzistojnë baza për hetim ndaj Dodikut”, deklaroi Suljagiç.
Mlladiç u dënua për 10 nga 11 akuzat e ngritura ndaj tij, përfshirë gjenocidin ndaj mbi 8 mijë boshnjakëve në Srebrenicë në verën e vitit 1995, persekutimin dhe dëbimin e boshnjakëve dhe kroatëve, terrorizimin e civilëve gjatë rrethimit të Sarajevës dhe marrjen peng të paqeruajtësve të OKB-së.
Ai u arrestua në Serbi në maj të vitit 2011 dhe u ekstradua në Hagë pak ditë më vonë, ndërsa vendimi përfundimtar me burgim të përjetshëm u konfirmua në vitin 2021.