Dugolli: Ne presim që terrori shtetëror i Serbisë të denoncohet njëzëri dhe të ndalet menjëherë
Ambasadori i Kosovës në Shtetet e Bashkuara të Amerikës, Ilir Dugolli, e ka denoncuar terrorin e sponsorizuar nga Serbia në veriun e Kosovës dhe akuzon presidentin serb, Aleksandër Vuçiq, për tentim të destabilizimit të tërë rajonit në Ballkanin Perëndimor. “Ne presim që terrori shtetëror i Serbisë të denoncohet njëzëri dhe të ndalet menjëherë”, ka kërkuar […]
Ambasadori i Kosovës në Shtetet e Bashkuara të Amerikës, Ilir Dugolli, e ka denoncuar terrorin e sponsorizuar nga Serbia në veriun e Kosovës dhe akuzon presidentin serb, Aleksandër Vuçiq, për tentim të destabilizimit të tërë rajonit në Ballkanin Perëndimor.
“Ne presim që terrori shtetëror i Serbisë të denoncohet njëzëri dhe të ndalet menjëherë”, ka kërkuar ambasadori i Kosovës në SHBA.
Më tej, ai ka thënë se “udhëheqja e Serbisë ngjall frikë, përdor frikësimin dhe sulmet hibride, nxit destabilitetin dhe minon institucionet demokratike qoftë në Kosovë, Bosnjë dhe Hercegovinë apo në Malin e Zi”.
“Fakti i thjeshtë është se Serbia po vazhdon të veprojë si një shtet mashtrues me dhunën në qendër të politikave dhe veprimeve të tij!. Sot, në aktin e tyre të fundit të çmendurisë luftarake, grupet terroriste të sponsorizuara nga Beogradi sulmuan Policinë e Kosovës”, ka thënë ai.
Ndërkohë, Dugolli ia ka shfaqur dyfytyrësinë e Vuçiqit, duke treguar që ky i fundit e ka shkelur marrëveshjen e Brukselit dhe të Ohrit.
“Dy ditë më parë, presidenti serb Vuçiç keqpërdori OKB-në si një platformë për t’i dhënë botës leksione mbi të drejtën ndërkombëtare, duke u përfshirë në revizionizëm të paturpshëm dhe shkelje flagrante të detyrimeve sipas Marrëveshjes Bruksel-Ohër”.
“Ai shpërfill sistematikisht parimet themelore të rendit ndërkombëtar të bazuar në rregulla, kërcënon rastësisht të ‘fundojë pushtimin’, promovon ‘botën serbe’, hedh poshtë vendimin e Gjykatës Ndërkombëtare të Drejtësisë mbi Deklaratën e Pavarësisë së Kosovës, hedh poshtë vendimet e ICTY dhe GJND-së për gjenocidin, sulmon ushtarët dhe policinë e KFOR-it, dhe në vend që të shprehë keqardhje, vazhdon me pafytyrësi të ushqejë aspiratat hegjemoniste”, ka përfunduar Dugolli.
Tutje, ai ka përfunduar duke thënë “u preftë në paqe shpirti i policit tonë trim që humbëm sot!”















