Dy aksidente trafiku kanë ndodhur këtë të diel në autostradën “Ibrahin Rugova”, ku në njërin prej tyre shtatë persona kanë pësuar lëndime trupore.
Në aksidentin e parë janë përfshirë tri automjete ku si pasojë e përplasjes, shtatë persona kanë mbetur të lënduar dhe kanë marrë trajtimin e nevojshëm mjekësor, njofton Dukagjini.
Rastin për Dukagjinin e konfirmoi edhe zëdhënësi i Policisë së Kosovës, Bajram Krasniqi.
Krasniqi bëri të ditur se rreth 500 metra më larg ka ndodhur edhe një aksident tjetër, ku janë përfshirë dy automjete veçse në këtë rast nuk raportohet për persona të lënduar, ndërsa janë shkaktuar vetëm dëme materiale.
“Në autostradë për Shqipëri kanë ndodhur dy aksidente, në njërin aksident janë të përfshira tri automjete dhe lëndime kanë pësuar shtatë persona. Në aksidentin tjetër (500m më larg) ka ndodhur aksidenti tjetër ku të përfshira janë dy automjete, në këtë aksident nuk ka persona të lënduar. Me aksidente po merren njësitet e autostradës”, tha Krasniqi.