Kryeministri i Holandës, Mark Rutte dhe kryeministri i Luksemburgut, Xavier Bettel, do ta vizitojnë Kosovën në fillim të javës së ardhshme.
Siç raporton gazeta holandeze “Haarlems Dagblad”, dyshja pritet të vizitojnë Kosovën të hënën dhe të martën. Pas Kosovës, të njëjtit do ta vizitojnë edhe Serbinë.
Dialogu Kosovë-Serbi dhe depërshkallëzimi i situatës në vend do të jenë tema diskutimi.
Përndryshe, tensionet në veriun e Kosovës, të banuar me shumicë serbe, nisën më 26 maj, kur kryetarët e rinj shqiptarë të Zveçanit, të Zubin Potokut dhe të Leposaviqit, hynë në ndërtesat komunale nën përcjelljen e Policisë së Kosovës.
Serbët kundërshtuan këtë dhe që atëherë po zhvillojnë protesta duke kërkuar tërheqjen e kryetarëve të rinj dhe të njësive speciale policore.
Bashkësia ndërkombëtare i ka paraqitur Kurtit tri kërkesa kryesore: qetësimin e situatës në veri, mbajtjen e zgjedhjeve të reja në katër komunat veriore dhe rikthimin në dialogun për normalizimin e raporteve Kosovë-Serbi.
Ndërkaq, nga Beogradi është kërkuar që të sigurojë që serbët të marrin pjesë pa kushte në zgjedhjet eventuale lokale.