Policia e Kosovës ka raportuar për dy sulme ndaj personave zyrtarë në komunën e Zveçanit, të mërkurën e 31 majit, në dy raste të ndara.
Në raportin 24-orësh të policisë thuhet se në rastin e parë teksa zyrtarët kanë qenë duke patrulluar janë sulmuar me gurë nga persona të panjohur.
Si pasojë e kësaj, është dëmtuar automjeti zyrtar.
Ky rast po vazhdon të hetohet.
“Raportohet se zyrtarët policorë, derisa kanë qenë duke patrulluar, janë sulmuar me gurë nga persona të panjohur, si pasojë iu është dëmtuar automjeti zyrtar. Rasti është duke u hetuar”, thuhet në raport.
Ndërkaq, një sulm tjetër në po të njëjtën komunë ka ndodhur edhe pasditen e së mërkurës, ku një veturë e njësisë policore është sulmuar me mjete të forta nga persona të panjohur.
Si pasojë e kësaj, është lënduar një zyrtar policor dhe është dëmtuar vetura policore.
Rasti vazhdon të hetohet.
“Dy njësi policore derisa kanë qenë duke lëvizur me vetura zyrtare, njëra veturë është sulmuar me mjete të forta nga persona të pa njohur. Si pasojë, lëndime ka pësuar zyrtari policor dhe është dëmtuar vetura zyrtare. Rasti është duke u hetuar”, vijon njoftimi.