Gjykata Themelore e Prishtinës ka caktuar masën e sigurisë ndaj dy të dyshuarve për rastin e rrëzimit të kulmit të ndërtesës së Komunës së Prishtinës.
Njërit nga zyrtarët komunal Y.J., i cili është arrestuar nën dyshimin për keqpërdorim të pozitës apo autoritetit zyrtar, i është caktuar masa e ndalimit për t’iu afruar vendit apo personit të caktuar dhe qasja në zyrat e Komunës së Prishtinës.
Në njoftimin e Gjykatës thuhet se masa vlen deri më 21 shkurt, e në rast të mosrespektimit të masës do t’i zëvendësohet ajo me masën e paraburgimit.
Në anën tjetër, ndaj përfaqësuesit përgjegjës të kompanisë punuese në vendpunishten e kompanisë në fjalë, B.B. është caktuar masa e arrestit shtëpiak prej një muaji.
Pullazi i ndërtesës së re së Komunës së Prishtinës është rrëzuar të enjten e javës së kaluar, duke i shkaktuar lëndime të rënda një 23-vjeçareje.