Armend Mehaj ka dhënë dorëheqje nga pozita e ministrit të Mbrojtjes, në të cilën shërbeu pak më shumë se dy vjet. Arsyet e dorëheqjes janë bërë të ditura nga vetë Mehaj, duke theksuar se kanë të bëjnë vetëm me çështje personale apo familjare.

Nën udhëheqjen e Mehajt, në dy vitet e para është dyfishuar buxheti i Ministrisë së Mbrojtjes nga 64 milionë euro, në 123 milionë. Po ashtu, gjatë mandatit të tij janë rekrutuar rreth 1836 rekrutë të rinj.

Gjatë viteve 2021 dhe 2022, Ministria e Mbrojtjes e kishte realizuar pothuajse në plotni buxhetin vjetor. Në 2021 ishte 96 për qind e buxhetit të realizuar, kurse më 2022 realizimi ishte 95%.

Ministri i Mbrojtjes, Armend Mehaj, me ushtaret e reja të FSK-së

Po ashtu, nën mandatin e Mehajt, FSK-ja pati suksese në shkollimin e ushtarëve dhe të oficerëve, të cilët mbi 16 herë ishin dërguar në akademi ushtarake në Shtetet e Bashkuara të Amerikës, Britaninë e Madhe, Gjermani, Turqi, Shqipëri, Kroaci e kështu me radhë.

FSK-ja gjatë kësaj kohe e ka ndihmuar edhe shtetin e Turqisë në kërkim-shpëtimin e njerëzve si pasojë e tërmetit vdekjeprurës.

Specialistët e kërkim-shpëtimit urban, ekipet e mjekësisë emergjente dhe ata K9, të FSK-së duke zhvilluar operacionet e kërkim-shpëtimit në Turqi

Nën udhëheqjen e ministrit Mehaj, për herë të parë në historinë e FSK-së, është marrë pjesë në misionet e mbështetjes së paqes në Lindje të Mesme dhe në Ishujt Falkland, përkrah ushtrive partnere të ShBA-së dhe të Britanisë së Madhe.

Së fundmi, para tri javësh, ishte bërë e ditur se Kosova ka blerë disa dronë Bayraktar nga Turqia, kjo për herë të parë në historinë e shtetit të Kosovës.

Dronët “Bayraktar TB2” bëjnë pjesë te kategoria e dronëve më të mëdhenj.

Droni “Bayraktar TB2” është zhvilluar në Turqi nga Selcuk Bayrakar, i diplomuar në Institutin e Teknologjisë të Masaçusetsit.

Pas dorëheqjes, Mehaj e falënderoi popullin e Kosovës, dhe tha se zgjedhja e Ejup Maqedoncit si zëvendësim për të ishte zgjidhja e duhur.

Çfarë janë dronët “Bayraktar TB2”, të cilët Kosova i bleu nga Turqia