Vapa i solli në Gërmi, por dryri në derë të pishinës i ktheu të zhgënjyer pas.
Si kjo familje, edhe dhjetëra të tjera të mërkurën, s’e shfrytëzuan dot Pishinën e Gërmisë, pas vendimit që ajo të mbyllet përkohësisht, vetëm dy javë pas hapjes për sezonën verore.
Vendimi u mor me kërkesë të Inspektoratit Sanitar, pas një ankese që ngriti dyshime për cilësinë e ujit.
Për kryeshefin e Ndërmarrjes Publike Lokale, “Sport Marketing”, uji i përmbush kriteret, por ankesat që po vijnë nga asamblisti i Vetëvendosjes, Enver Redenica, bëhen me tendencë.
“Ndjej keqardhje, sepse po shkakton edhe polemikë edhe presion të qytetarët, edhe në një farë forme po e dëmton imazhin e ndërmarrjes, një ndërmarrje që po mundohet t’i ofrojë qytetarëve më të mirën”, ka deklaruar Bardh Krasniqi, kryeshef i NPL “Sport Marketing”.
Këto pretendime i hedh poshtë vetë Redenica.
Sipas tij, problemi nuk është ankesa, por gjendja reale e pishinës.
“Kjo është shumë dhe unë mendoj që këtu meqë është politizëm, nuk është Bardh Krasniqin tu e pengu Qeveria e Kosovës, nuk është tu e blloku me ble një apparat të filtrimit, as Dejona Mihajli. Duhet mu punu këtu, e jo me ja vnu fajin diku tjetër”, ka theksuar Enver Redenica, asamblist i VV-së në Prishtinë.
Madje, ai akuzon komunën e Prishtinës se po tenton të fshehë problemet me cilësinë e ujit përmes ndërhyrjeve të tjera.
“Po i mashtrojnë qytetarët këtu, dhe sivjet e kam pa me sytë e mi që e kanë ngjyros pishinën e Gërmisë, dhe e kanë përzi me ujë vetëm sa me i mashtru qytetarët me ardhë këtu, përpos biletave që janë shumë të shtrenjta”, ka deklaruar Redenica.
Përkundër këtyre deklaratave, kryeshefi Krasniqi është i bindur për cilësinë e ujit.
“Ne e kemi të punësuar edhe një mikrobiologe këtu në ndërmarrje që bënë analiza të përditshme në pishinë, kështu që vlerat e ujit janë normale”, ka theksuar ai.
Përgjigjen finale për këtë situatë pritet që gjatë ditëve në vazhdim ta jep Instituti Kombëtar i Shëndetësisë Publike, ku janë dërguar mostrat për analizë.
Instituti njoftoi Dukagjini përmes email-it se deri më 7 korrik nuk kishte pranuar kërkesa të tjera për analiza të ujit të Pishinës së Gërmisë, prandaj nuk disponon rezultate laboratorike të kryera para asaj date.