Një mësues nga komuna e Vushtrrisë është suspenduar nga puna, pasi i njëjti dyshohet se ka ngacmuar seksualisht një nxënëse të klasës së gjashtë.
Këtë për Portalin Dukagjini e ka konfirmuar kryetari i komunës, Ferit Idrizi, i cili ka thënë se i dyshuari ishte mësimdhënës i shkollës fillorë të mesme të ulët “Anton Zako Çajupi”.
Ai ka shprehur zero tolerancë për këdo që shkel ligjin.
“Ai është suspenduar me vendim të komisionit disiplinor, ndërsa tash po merret prokurori i çështjes në këtë rast. Mësuesi ka qenë në shkollën fillore të mesme të ulët “Anton Zako Çajupi”, në Vushtrri”, ka thënë Idrizi.
Prokuroria ngre aktakuzë ndaj të dyshuarit
Zëdhënësi i Prokurorisë Themelore në Mitrovicë, Valon Preteni, ka thënë për Portalin Dukagjini se është ngritur aktakuzë ndaj një mësuesi nga Vushtrria, i cili dyshohet për ngacmim seksual dhe keqtrajtim gjatë ushtrimit të detyrës zyrtare.
“Prokuroria Themelore në Mitrovicë ka pranuar kallëzimin penal ndaj personit me iniciale F.K., për veprën penale “Ngacmimi seksual”. Rasti është trajtuar, janë zhvilluar hetimet kundër të dyshuarit, dhe pas hetimeve me datë 20 dhjetor 2022 kundër të pandehurit, është ngritur aktakuzë në drejtim të veprave penale “Keqtrajtimi gjatë ushtrimit të detyrës zyrtare ose autorizimeve publike” dhe “Ngacmimi Seksual””, ka thënë Preteni.