Drejtoria për Hetimin e Krimeve Ekonomike dhe Korrupsionit (DHKEK) në bashkëveprim me Sektorin për Hetime Financiare kanë kryer një operacion në Gjakovë më 11.11.2023, duke zbatuar urdhëresën e Gjykatës Themelore në Prishtinë –Departamenti Special.
“Hetuesit policorë nga Drejtoria për Hetimin e Krimeve Ekonomike dhe Korrupsionit (DHKEK), gjegjësisht hetuesit nga Sektori për Hetime Financiare, sot më 11.11.2023, kanë zbatuar urdhëresën e Gjykatës Themelore në Prishtinë –Departamenti Special, ku janë kontrolluar tri lokacione në Gjakovë”.
Ky operacion u realizua në përgjigje të një kërkese nga autoritetet e Belgjikës, e cila u dërgua autoriteteve shtetërore të Kosovës për Ndihmë Juridike Ndërkombëtare dhe pastaj u përcoll në DHKEK nga Prokuroria Speciale e Kosovës për zbatim.
“Dyshohet se shtetas të Republikës se Kosovës në bashkëveprim me disa shtetas të Belgjikës gjatë periudhës kohore 2020 -2022 janë marrë me veprimtari penale dhe dyshohet të kenë krijuar të ardhura të mëdha të cilat përmes rrugëve të ndryshme i kanë transferuar në Kosovë duke investuar në paluajtshmëri”, thuhet në komunikatë.
Tutje në njoftim theksohet se “gjatë kontrollit është arritur të sigurohen fatura të shpenzimeve, të cilat të dyshuarit i kanë investuar në Kosovë, e që dyshohet të jenë produkt i veprave penale të kryera nga ana e tyre”.
Në procesin e kontrollit ka marrë pjesë edhe “një ekip nga Belgjika (një gjyqtar hetues dhe tre hetues policorë), bazuar në lejen e autoriteteve shtetërore të Republikës së Kosovës”.
Ndërsa, rasti vazhdon të hetohet në bashkëveprim me autoritetet e Belgjikës.