Ebola ka shkaktuar të paktën 65 viktima në Republikën Demokratike të Kongos, ndërsa autoritetet shëndetësore kanë raportuar deri tani 246 raste të dyshuara në provincën Ituri, pranë kufirit me Ugandaën dhe Sudanin e Jugut.
Qendrat Afrikane për Kontrollin dhe Parandalimin e Sëmundjeve kanë ngritur shqetësimin për mundësinë e përhapjes së mëtejshme të virusit, duke theksuar se zona e prekur karakterizohet nga qytete minerare me dendësi të lartë të popullsisë, çka vështirëson kontrollin e sëmundjeve infektive.
Sipas autoriteteve shëndetësore, Ebola përhapet përmes kontaktit të drejtpërdrejtë me lëngjet trupore të personave të infektuar, si gjaku apo të vjellat, por edhe gjatë kontaktit me trupat e viktimave gjatë ceremonive mortore.
Laboratori kombëtar kërkimor i Kongos ka konfirmuar praninë e virusit në 13 nga 20 mostrat e analizuara deri më tani.
Ekspertët bëjnë të ditur se vendi ka përjetuar 16 shpërthime të Ebolës që nga identifikimi i parë i virusit në vitin 1976. Shumica e rasteve të mëhershme kanë qenë të lidhura me variantin Zaire, për të cilin ekzistojnë vaksina efektive.
Megjithatë, të dhënat paraprake sugjerojnë se shpërthimi aktual mund të lidhet me një variant tjetër të virusit, ndërsa rezultatet e plota të analizave gjenetike pritet të publikohen së shpejti.
Autoritetet shëndetësore afrikane kanë paralajmëruar mbajtjen e një takimi urgjent me përfaqësues të Kongos, Ugandës, Sudanit të Jugut, Organizatës Botërore të Shëndetësisë dhe kompanive farmaceutike, për koordinimin e përgjigjes ndaj situatës.
Epidemia më e rëndë e Ebolës u regjistrua në Afrikën Perëndimore gjatë viteve 2014–2016, kur u raportuan rreth 28 mijë raste dhe mbi 11 mijë viktima.