Brenda Lidhjes Demokratike të Kosovës po thellohet përplasja për drejtimin e partisë, pas rezultateve të zgjedhjeve të 7 qershorit, ku kërkesat për dorëheqje ndaj kryetarit Lumir Abdixhiku po shtohen nga strukturat lokale.
Nënkryetari i Degës II të LDK-së në Prishtinë, Florian Dushi, ka kërkuar publikisht në Debat Plus largimin e Abdixhikut nga posti i kryetarit të partisë, duke thënë se kjo është vendosur unanimisht brenda degës.
Në deklarimin e tij në Debat Plus, Dushi tha se pas një debati të brendshëm dhe analizës së rezultatit zgjedhor, Dega II ka dalë me qëndrim të qartë për nevojën e ndryshimit në krye të partisë.
“Dega e dytë sonte në mënyrë unanime, pas një debati të gjerë dhe të thellë, dhe analizimit të të gjitha rrethanave dhe analizimit të rezultatit të zgjedhjeve, i cili është i treti me radhë me radhë jo i mirë për LDK-në, unanimisht ka kërkuar edhe publikisht që kryetari Lumri Abdixhiku të jap dorëheqja nga pozita e kryetarit të LDK-së. T’i hap udhë ndryshimeve në këtë parit dhe lidershipit të ri”, ka thënë Dushi.
Ky qëndrim e rreshton Degën II të Prishtinës përkrah degëve të Pejës dhe Lipjanit, të cilat gjithashtu kanë kërkuar përgjegjësi politike dhe dorëheqje nga lidershipi qendror.