Partia Demokratike e Kosovës (PDK) ka refuzuar ftesën e kryeministrit në detyrë, Albin Kurti, për takim, duke ritheksuar se do të vazhdojë të mbetet në opozitë.
Në letrën e dërguar nga kryetari i PDK-së, Bedri Hamza, drejtuar Kurtit, ai e falënderon për ftesën, por konfirmon se qëndrimi i partisë mbetet i pandryshuar.
“Ju falënderoj për ftesën për takim. Duke iu referuar takimit tonë të datës 10 korrik 2026 dhe qëndrimit publik të PDK-së, ju rikonfirmoj se, në rrethanat aktuale, qëndrimi ynë është që të vazhdojmë të qëndrojmë në opozitë”, thuhet në letrën e Hamzës.
Ai gjithashtu thekson se përgjegjësia për krijimin e institucioneve të reja i takon partive që kanë dalë nga zgjedhjet e 7 qershorit 2026.
“Presim që ju, në përputhje me përgjegjësitë që ju burojnë nga zgjedhjet e 7 qershorit 2026, së bashku me partitë e tjera të përfaqësuara në Kuvendin e Kosovës, të arrini marrëveshje për krijimin e institucioneve të reja të vendit”, shkruan Hamza.
