Edhe LDK-ja lëshon sallën, seanca konstituive shtyhet për të dielën
Kriza rreth konstituimit të Kuvendit ka vazhduar edhe të premten, me seancën konstituive që është ndërprerë dy herë brenda ditës. Pas zhvillimeve të fundit, vazhdimi i seancës është caktuar për të dielën në orën 10:00. Pengesë për vazhdimin e punimeve këtë herë u bë LDK-ja, e cila lëshoi sallën duke kërkuar që fillimisht të zgjidhet […]
Kriza rreth konstituimit të Kuvendit ka vazhduar edhe të premten, me seancën konstituive që është ndërprerë dy herë brenda ditës.
Pas zhvillimeve të fundit, vazhdimi i seancës është caktuar për të dielën në orën 10:00.
Pengesë për vazhdimin e punimeve këtë herë u bë LDK-ja, e cila lëshoi sallën duke kërkuar që fillimisht të zgjidhet nënkryetari i Kuvendit nga radhët e PDK-së.
Sipas LDK-së, nuk mund të vazhdohet me zgjedhjen e nënkryetarëve të tjerë pa u përmbushur kjo pozitë.
Seanca ishte ndërprerë edhe më herët gjatë ditës, pasi deputetët e PDK-së u larguan nga salla pas dështimit të kandidates së tyre, Vlora Çitaku, për t’u zgjedhur nënkryetare.
Në votimin paraprak, kandidati i LVV-së, Ardian Gola, mori përkrahjen e deputetëve dhe u zgjodh nënkryetar i Kuvendit. PDK-ja, ndërkohë, e kishte mbështetur Golën, por nuk mori të njëjtën përkrahje për kandidaten e saj.
Pas largimit të PDK-së, kreu i kësaj partie, Bedri Hamza, deklaroi se deputetët e PDK-së nuk do të marrin më pjesë në punimet e Kuvendit dhe paralajmëroi dërgimin e çështjes në Gjykatën Kushtetuese.
Me largimin e LDK-së, procesi i zgjedhjes së nënkryetarëve mbeti përsëri i bllokuar, ndërsa kryeparlamentarja Albulena Haxhiu njoftoi se seanca do të vazhdojë të dielën në orën 10:00.















