Ministria e Punëve të Jashtme dhe Diasporës (MPJD), respektivisht Komisioni Disiplinor, e ka përjashtuar përfundimisht, diplomatin Albert Prenkaj, nga Shërbimi Civil.
Vendimi për largimin e tij nga puna është bërë përkundër që Gjykata Themelore e Prishtinës, më 20 mars, e kishte aprovuar si të bazuar kërkesën e Albert Prenkajt kundër Këshillit të Pavarur Mbikëqyrës të Shërbimit Civil të Kosovës.
Sipas vendimit, të Gjykatës është anuluar vendimi i Këshillit të Pavarur Mbikëqyrës të Shërbimit Civil të Kosovës, dhe çështja duhet të kthehet në rishqyrtim dhe rivendosje.
Por, MPJD, nuk e ka marrë parasysh vendimin në fjalë, duke mos anuluar vendimin për pezullim, por përkundrazi, Prenkaj është përjashtuar.
Portali Dukagjini, e ka siguruar vendimin me anë të së cilit përjashtohet nga puna Prenkaj.
“Ndaj z.Albert Prenkaj në vendin e punës Drejtor i Departamentit për Amerikë, Sekretari Përgjithshëm i Ministrisë së Punëve të Jashtme dhe Diasporës/Mbikëqyrësi i drejtpërdrejtë me datën 28.03.2023, ka iniciuar procedurën disiplinore, me arsyetimin se: “Me date 28.03.2023, ne cilësinë e mbikëqyrësit te drejtpërdrejtë te pozitës së drejtorit të Departamentit për Amerika, duke marre parasysh detyrat dhe përgjegjësitë, pasi kam shqyrtuar shkaqet, rrethanat e kryerjes se shkeljeve, rëndësinë, pasojat, shkallen e fajësisë, shqiptimin e masave paraprake disiplinore si dhe kualifikimin e shkeljeve, kam konstatuar se, ne mbështetje te nenit 46 (paragrafët 1, 2.2.1, paragrafit 3.3.1, 3.3.3, 3.3.6, 3.3.8 dhe 3.3.10), nenit 48 (paragrafi 2) te Ligiit nr. 06/L -114 për Zyrtaret Publikë, si dhe neneve 4 dhe 5 (paragrafi 1.1.1 dhe paragrafi 2), nenit…”, thuhet në vendim.
Në fjalën e tij para komisionit disiplinor, të cilën e ka siguruar Portali Dukagjini, Prenkaj ka thënë se MPJD-ja, është duke e shkelur Kushtetutën e vendit.
“Kjo që po ndodhë sot dhe në përgjithësi në Ministri është ndërmarrje antikushtetuese që shkel të drejtat fundamentale, si: neni 23. dinjiteti i njeriut; neni 26. e drejta e integritetit personal; neni 29. e drejta e lirisë dhe sigurisë; neni 43. liria e tubimit; neni 44 liria e asociimit; neni 49. e drejta e punës dhe ushtrimit të profesionit”, ka thënë ai.
Po ashtu, ai ka thënë se Behar Isma, është emëruar nga ministrja Donika Gërvalla në mënyrë të paligjshme dhe se është duke e ushtruar pozitën e tij të zëvendësuesit të Sekretarit të Përgjithshëm në mënyrë joligjore.
Ai ka thënë se përveç Ismës, edhe Gërvalla ka lëshuar dokumente në mënyrë të paligjshme, që sipas tij është subjekt i trajtimeve të organeve shtetërorë.
“Mbi këtë grup të udhëhequr nga vet Ministrja Gërvalla Schwarz do të ketë hetime të vazhdueshme, aktpadi të bazuara nëpër vite, për dëmet financiare të cilat i janë shkaktuar Ministrisë dhe thyerjet ligjore konstante gjatë vendimmarrjes”, ka thënë ai.
Prenkaj ka thënë se Komisioni Disiplinor nuk ka fuqi juridike të merr vendime.
“Sa i përket Komisionit Disiplinor në përbërjen: Besim Berisha, kryesues, Hyzri Bunjaku dhe Katarina Kërquku, anëtar, me procesmbajtës Elmas Shufta nga NjMBNj, më lejoni të ju përkujtoj siç e theksova më lartë se ky grup sot nuk ka mbështetje juridike, meqë është themeluar me nënshkrimin e personit që mbanë në mënyrë të paligjshme pozitën e zëvendësuesit të Sekretarit të Përgjithshëm. Pra ky grup i quajtur Komision Disciplinorë nuk ka zotësi juridike për të ndërmarrë aktivitet sipas normës ligjore në fuqi, dhe si i tillë nuk ka asnjë fuqi juridike të merr vendim”, ka thënë ai.
Prenkaj ishte pezulluar dhe tash përjashtuar nga puna me arsyetimin se ka protestuar kundër MPJD-së. Por, sipas tij, kjo nuk është e kundër ligjshme por e drejtë që ia garanton ligji.
Pretendimet e tij i kishte vërtetuar Gjykata Themelore, por kjo nuk ka ndikuar që ai të kthehet në punë, përkundrazi është përjashtuar.
