Eksperti i Sigurisë, Bedri Elezaj, ka folur për Portalin Dukagjini për thirrjet të cilat po vijnë për protesta te Ura e Ibrit, ku ai ka thënë se këto thirrje mund të jenë nga shërbimi sekret serborus.
Dhe, sipas tij, Agjencia për Inteligjencë e Kosovës (AKI) duhet të jetë vigjilente që t’i gjejë këto profile dhe se nga vijnë këto thirrje që janë kërcënim për sigurinë kombëtare të Kosovës.
“AKI-ja duhet të hulumtojë urgjentisht burimet se nga po vijnë thirrjet [për protesta të Ura e Ibrit] dhe të fillojë procedura për ndjekin e tyre, sepse këto thirrje kanë të bëjnë direkt me organizim për destabilizim[të Kosovës] të cilat e atakojnë sigurinë kombëtare”, ka sqaruar Elezaj.
“Thirrjet publike që tani janë shfaqur në rrjetet sociale përkatësisht në TikTok, vërtet janë shumë shqetësues në aspektin e sigurisë. Këto janë të rrezikshme se mund të kemi përplasje të qytetarëve shqiptarë me Policinë e Kosovës, por edhe ndërmjet qytetarëve shqiptarë edhe atyre serbë”, ka thënë eksperti i sigurisë, Bedri Elezaj, në një intervistë për Portalin Dukagjini.
Sipas tij, kjo thirrje mund të jetë e bërë nga inteligjenca e shtetit serb apo e atij rus.
“Kjo thirrje për protestë mund të vijë nga strukturat e sigurisë të shtetit serb apo atij rus, që kanë për synim ta bindin faktorin ndërkombëtar se janë shqiptarët ata që janë element i destabilizimit në veri të Mitrovicës dhe të gjithë rajonit”, ka përfunduar ai.