Si rezultat i bashkëpunimit operacional ndërmjet Interpol Tirana dhe Interpol Wiesbaden, në kuadër të operacionit ndërkombëtar të koduar “The Wanted”, është finalizuar ekstradimi nga Gjermania drejt Shqipërisë i shtetasit Sokol Ndreka, 51 vjeç.
Ndreka ishte shpallur në kërkim ndërkombëtar, pasi Gjykata e Shkallës së Parë e Juridiksionit të Përgjithshëm Tiranë, në vitin 2024, e ka dënuar me 6 vite burgim për veprat penale “Ndihma për kalim të paligjshëm të kufijve” dhe “Largimi i të burgosurit nga vendi i qëndrimit”.
Sipas Policisë, më 31 tetor 2022, në rrugën dytësore Tiranë–Durrës, janë kapur në një automjet 15 shtetas të huaj, emigrantë të paligjshëm. Nga hetimet e zhvilluara ka rezultuar se Sokol Ndreka ishte i përfshirë në aktivitetin e paligjshëm të trafikimit të emigrantëve.
Falë bashkëpunimit mes strukturave të Interpolit në Tiranë dhe Gjermani, u bë i mundur arrestimi i tij në territorin gjerman dhe më pas ekstradimi drejt Shqipërisë, për vuajtjen e dënimit të dhënë nga drejtësia shqiptare.