Një shtetas i Kosovës me inicialet K.B. është ekstraduar të martën nga Zvicra në Kosovë, pasi kërkohej nga autoritetet kosovare me letërreshtim ndërkombëtar për veprën penale “Vjedhje e rëndë”.
Policia e Kosovës bëri të ditur se ekstradimi u realizua nga Drejtoria për Bashkëpunim Ndërkombëtar Policor, në koordinim me njësitë relevante të policisë dhe institucionet e drejtësisë.
“I dyshuari ishte arrestuar nga autoritetet zvicerane pasi që i njëjti kërkohej përmes INTERPOL-it me letërreshtim ndërkombëtar të lëshuar nga institucionet e drejtësisë së Kosovës, për veprën penale ‘Vjedhje e rëndë'”, thuhet në njoftimin e Policisë.
Sipas policisë, ekstradimi u realizua në bazë të legjislacionit në fuqi dhe bashkëpunimit ndërmjet institucioneve të Kosovës dhe Zvicrës. Pas mbërritjes në Kosovë, i dyshuari iu dorëzua njësive kompetente për vazhdimin e procedurave ligjore.
“Policia e Kosovës, gjegjësisht Drejtoria për Bashkëpunim Ndërkombëtar, do të vazhdojë shkëmbimin e informacioneve me institucionet vendore, shtetet dhe organizatat ndërkombëtare, me qëllim të parandalimit, hetimit dhe zbulimit të aktiviteteve kriminale, si dhe gjurmimin dhe arrestimin e personave të kërkuar”, thuhet më tej në njoftim.