Ministri i Financave, Punës dhe Transfereve, Hekuran Murati, ka bërë të ditur se të mërkurën, 50,778 studentë do të pranojnë mbështetjen e njëhershme prej 100 eurosh, në kuadër të Pakos për Përballje me Inflacionin.
Përmes një postimi në Facebook, Murati ka shkruar se një mbështetje e tillë nuk mbaron me kaq.
“50,778 studentë sot pranojnë mbështetjen e njëhershme prej 100 eurosh, në kuadër të Pakos për Përballje me Inflacionin. Mbështetja për studentët nuk mbaron me kaq. Studimet i kemi bërë falas, kurse sivjet kemi rritur edhe numrin e bursave në 2 mijë për ata që studiojnë në STEM, nga 1,000 sa ishte vitin e kaluar. Qeveria për studentët!”, ka shkruar Murati.
Të martën e 29 nëntorit, Qeveria e Kosovës në mbledhjen e 110 të saj, ka aprovuar kërkesat e Ministrisë së Financave për ekzekutimin e pakos për përballje me inflacionin, ku parashihet ndarja e shtesave prej 100 eurosh për punonjësit e ndërmarrjeve publike edhe studentët.