Pas përfundimit të procesit të verifikimit të fletëvotimeve në Qendrën Komunale të Numërimit në Mitrovicën e Jugut, anëtari i PDK-së në KQZ, Arianit Elshani, ka deklaruar se gjatë numërimit janë hasur fletëvotime me numra serikë të vendvotimeve të ndryshme.
Në një postim në Facebook, Elshani shkruan se përzierja e fletëvotimeve nga klasat dhe shkollat e ndryshme ka qenë shqetësuese dhe është evidentuar në disa vendvotime.
Ai thekson se të gjitha dëshmitë dhe rastet e mbledhura do të adresohen në Panelin Zgjedhor për Ankesa dhe Parashtresa (PZAP) dhe procesi do të ndiqet deri në fund, duke kërkuar rivotim për qytetarët e Mitrovicës.
“Sapo përfundoi procesi i verifikimit të fletëvotimeve në Qendrën Komunale të Numërimit.
Që nga momenti kur u identifikuan fletëvotime me numra serikë që i përkasin vendvotimeve të tjera, jemi angazhuar me të gjitha ekipet e numërimit dhe me vëzhguesit e PDK-së në Mitrovicë për të evidentuar çdo rast të dyshimtë.
Është jashtëzakonisht shqetësuese që ky trend i përzierjes së fletëvotimeve nga klasa të ndryshme është hasur në disa vendvotime, madje edhe raste ku fletëvotime nga një shkollë janë gjetur në shkolla të tjera.
Të gjitha këto dëshmi dhe fakte të mbledhura do t’i adresojmë në PZAP, dhe këtë proces do ta çojmë deri në fund — deri në RIVOTIM!
Përgëzoj secilin anëtar të ekipit që ka qëndruar vigjilent në çdo moment, duke siguruar çdo provë që Mitrovica të shkojë në RIVOTIM”, ka shkruar Elshani.