Dëgjuesja e “Radar-it” që tash e sa vite, Elvira Zogaj ka ndarë me dëgjuesit një shkrim të sajin shumë emocional, që tregonte për ëndrrën e saj për t’u bërë police dhe për të bërë krenarë babin e saj, i cili është invalid i luftës së Ushtrisë Çlirimtare të Kosovës (UÇK).
Me sytë që i rrjedhshin lot, Elvira arriti të përcjellë emocione të forta tek të pranishmit në studio, dhe dëgjuesit e shikuesit të “Radar-it”.
Ajo përnes letrës së shkruar, ka treguar dashurinë e pa ndalur për punën e ëndërruar si police dhe zhgënjimin e saj për mospranim pas tri herë konkurrim.
Ajo ka thënë se në Kosovë nuk iu mundësohet punësimi atyre që një punë e kanë pasion, pasi sipas saj duhet të kesh dikë të afërm në institucionet e larta, që kanë funksion në shtet për të realizuar ëndrrën.
Ndërsa, tani në moshën 28 vjeçare, ajo ka humbur shpresën se ndonjëherë në të ardhmen do të jetësojë ëndrrën e saj.
Kjo ishte dita e tretë që dëgjuesit patën mundësinë të bashkëmoderojnë në emision, ndërkohë që java e dëgjuesve do të vazhdojë deri të premten.